ክልተ ኣውስትራላውያን ወተሃደራት፡ መጥቃዕቲ ሓርገጽ ኣጋጢምዎም

ክልተ ካብ ኣባላት ሰራዊት ኣውስትራልያ፡ ኣብ ከባቢ ኲዊንስላንድ፡ ሰሜን ኣውስትራልያ፡ ኣብ እትርከብ ብምግፋፍ ዓሳ እትናበር ገጠር ኣብ ዘሎ ቀላይ፡ እናሓንበሱ እንከለዉ፡ ብሓርገጽ፡ መጥቃዕቲ ከምዝወረዶም ንጸብጻባት ሮይተርስ ምርኩስ ብምግባር ማዕከን ዜና ተተ ሓቢሩ።
ሓደ ካብቶም ወተሃደራት፡ ኣብ ርእሱን ኣፍልቡን ከቢድ ማህሰይቲ ክወርዶ እንከሎ እቲ ንምድሓን ብጻዩ ዝመጸ ካልኣይ ወተሃደር ድማ ኣብ ኢዱን ቅልጽሙን ፍኹስ ዝበለ ማህሰይቲ ከምዝወረዶ እቲ ጸብጻብ ሓቢሩ።
ክልቲኦም ወተሃደራት፡ ሕክምናዊ ረዲኤት ንኽግብረሎም ናብቲ ኣብ ከተማ ካይርንስ ዝርከብ ሆስፒታል ከምዝተወስዱ ተገሊጹ።
ቁጽሪ ናይቶም ኣብ ኣውስትራልያ ዝርከቡ ናይ ጨዋይ ማይ ሓረግጽ፡ ካብ 100 ሽሕ ክሳብ 200 ሽሕ ከምዝበጽሕ ይፍለጥ።