ኣብ ሽወደን እቲ ኣዝዩ ኣገዳሲ ጒዳይ፡ ቀጻልነት ዘለዎ ሕብረተሰብ ምህናጽን ሸቶታት ክሊማ ምዕዋትን እዩ፡ ክብል ኣባል ሓምላይ ሰልፊ ፐር ቦሉንድ ኣተሓሳሲቡ። ንሱ ነዚ ዝበለ፡ ሓፈሻዊ ምርጫ ሽወደን ክካየድ ሓደ ወርሒ ጥራይ ተሪፍዎ ምህላዉ ምኽንያት ብምግባር፡ ሬድዮ ሽወደን ንሰልፊታት ባይቶ ኣብ ዝገበረቶ ቃለመሕትት እዩ።
“ዘይምዕዳል ኮይኑ፡ ብዘይካ ሓምላይ ካልኦት ሰልፊታት ኣብ ምውሳኽ በካሊ ጋዛት ግዲ ይገብራ የለዋን፡ ዝበለ ቦሉንድ፡ “በዚ ድማ ኣድላይነት ሰልፊና ኣብ ባይቶን መንግስቲን ኣዝዩ ዕዙዝ እዩ” ክብል ወሲኹ ኣተሓሳሲቡ’ሎ። ኣብ ዝሓለፋ ሸሞንተ ዓመታት፡ ሓምላይ ሰልፊ ምስ ኣብ ስልጣን ዘሎ ማሕበራዊ ዴሞክራሲ ተላፊኖም እኳ እንተነበሩ፡ ካብ ዓሚ ጀሚሮም ግና ካብ መንግስቲ ምውጽኦም ዝፍለጥ እዩ።
