እስራኤል፡ ኣብ ልዕሊ ቃዛ፡ ናይ ኣየር መጥቃዕቲ ፈጺማ

ሃገረ እስራኤል፡ ኣብ ልዕሊ ወተሃደራውን ጸጥታዊ ኑቕጣታት ጉጅለ ሓማስ ዝበለቶ ኣከባቢ፡ ናይ ነፈርቲ መጥቃዕቲ ከምዝፈጸመት ገሊጻ ክብል ማዕከን ዜና ተተ ኣቃሊሑ።

እዚ ናብ ሎሚ ዓርቢ ዘውገሐ ለይቲ ዝተፈጸመ መጥቃዕቲ ኣየር፡ ነቲ ብመንገዲ ሓማስ ኣቢሉ ናብ እስራኤል ዝተላእከ፡ ተባራዒ ባእታታት ዝሓዘ ባሎናት፡ ከም ግብረ መልሲ ዝተወስደ ስጉምቲ ምዃኑ፡ ሓይልታት ምክልኻል እስራኤል፡ ገሊጹ።

እቲ ተባራዒ ባእታ ዝሓዘ ባሎናት፡ ኣብ ከባቢታት ኢሽኮልን ዶባት ቃዛን ኣርባዕተ ናእሽቱ ናይ ምቅጻል ሓደጋ ከምዘስዓበ፡ እስራኤል፡ ሓቢራ። ብሰንኪ እዚ መጥቃዕቲ፡ ይኹን ብወገን እስራኤል ዝተኻየደ ናይ ኣየር መጥቃዕታት፡ ኣብ ልዕሊ ሰብ ዝወረደ ጉድኣት ዝሕብር ጸብጻብ ከምዘየለ ተፈሊጡ።