ኣቦ ዛምቢያ፡ ከኔት ካውንዳ፡ ዓሪፉ

ኣቦ ዛምቢያ ተባሂሉ ዝፍለጥ፡ ከኔት ካውንዳ፡ ትማሊ ሓሙስ ኣብ መበል 97 ዓመት ዕድሚኡ፡ ብሕማም ኒሞንያ ተጠቒዑ ኣብ ርእሰ ከተማ እታ ሃገር፡ ሉሳካ፡ ዝርከብ ሆስፒታል ክእለ ድሕሪ ምጽንሑ ከም ዝዓረፈ፡ ወዱ ካምባራገ፡ ሓቢሩ ክብል ማዕከን ዜና ተተ ኣቃሊሑ።
መራሒ ሰልፊ ሃገራዊ ሕብረት ንናጽነት(UNIP)ዝኾነ ካውንዳ፡ ነታ ሃገር ካብ መግዛእቲ ድሕሪ ምንጋፋ፡ ካብ 1964 ክሳብ 1991 ከም ፕረዚደንት ኮይኑ ክመርሓ ድሕሪ ምጽናሕ፡ ብፍሬድሪክ ቺሉባ ከም ዝተሳዕረ ይዝከር።
ኣብ ሃገረ ዛምቢያ፡ ን21 መዓልታት ዝጸንሕ ናይ ሓዘን እዋን ተኣዊጁ ከምዘሎን፡ ባንዴራ ውን ኣብ ፍርቂ ዘንጊ ከትምበልብል ምዃናን፡ ዝኾነ ናይ ምዝንጋዕ ንጥፈታት ውን ኣብዚ ዝተጠቕሰ መዓልታት ከምዘይህሉ፡ ዋና ጸሓፊ ካቢነ እታ ሃገር፡ ሳይመን ሚቲ፡ ብመንገዲ ተለቪዥን እታ ሃገር ኣፍሊጡ።