ኣብ ከተማ ዮተቦሪ፡ ብሰንኪ ናይ ቅትለት መልእኽቲ ዘስዓቦ ስግኣት፡ ሓንቲ ቤት ትምህርቲ ተዓጽያ

ሓደ መንነቱ ዘይተፈልጠ ተጠቃሚ ኢንስተግራም፡ ኣንጻር ሓንቲ ኣብ ከተማ ዮተቦሪ እትርከብ ኢንተርናሽናል ቤት ትምህርቲ (ISGR)፡ ናይ ቅትለት ፈተነ ከካይዱ ምዃኑ ድሕሪ ምጽሓፉ፡ እታ ቤት ትምህርቲ ን800 ተማሃሮኦ ኣብ ቤቶም ንኽጸንሑ ሎሚ ከምዝሓበረት ሬድዮ ሽወደን ኣቃሊሑ።

ምምሕዳር’ታ ቤት ትምህርቲ፡ ብዛዕባ’ቲ ጉዳይ ኣመልኪታ፡ ንፖሊስ ከምዝሓበረን፡ ነቲ ጉዳይ ንምክትታል ድማ ህጹጽ ኣኼባ ጸዊዑ ከምዘሎን ተፈሊጡ ኣሎ።

ቅድሚ ሕጂ፡ ከምዚ ዓይነት ናይ ምፍርራህ መልእኽቲ፡ ናብ ቤት ትምህርትና ተሰዲዱ ነይሩ እዩ። መንነት ናይቲ መልእኽቲ ዝሰደደ ኣካል፡ ክሳብ ሕጂ ኣይተፈልጠን ዘሎ ክትብል ሓለቓ’ታ ቤት ትምህርቲ፡ ቢሪታ ባራክ፡ ሓቢራ።