ብዕለት 26/08/2019፡ ጓል 31 ዓመት፡ ዶክተር ካሮሊና ሓኪም፡ ኣብ ጎደናታት ማልመ ምስ ህጻን ውላዳ እናተጓዕዘት እንከላ ብሓደ ሰብ ብእተተኮሰላ ጥይት ህይወታ ከምዝሰኣነት ይዝከር። ፖሊስ ሽወደን፡ ምስ’ዚ ጉዳይ ኢድ ኣለዎ ብምባል ንሓደ ወዲ 22 ዓመት መንእሰይ ኣብ ትሕቲ ቀይዲ ከምዘእተወ ኣገልግሎት ዜና SVT ሓቢሩ።
ዜና ናይታ ምስ ወዲ ኣርባዕተ ወርሒ ውሉዳ እናተጓዕዘት ኣብ ጽርግያ ዝተቐትለት ካሮሊን፡ ኣብ ህዝቢ ሽወደን ከቢድ ስንባደ ምፍጣሩ ዝዝከር እዩ።
ብሰኑይ ንግሆ፡ ኣኽባር ሕጊ፡ ነቲ መንእሰይ ብገበናት ቕትለትን ዘይሕጋዊ ኣጽዋር ምውናንን ብዝብል ክሲ፡ ኣብ ትሕቲ ቀይዲ ከእትዎ ምውሳኑ ዝፍለጥ ኮይኑ፡ ኣብ እዋን መርመራ፡ እዚ ሰብ፡ ኣቓልቦ ፖሊስ ምስሓቡን እዚ ድማ ብጭብጢታት ክረጋገጽ ምኽእሉን ኣኽባሪት ሕጊ፡ ሊሳ ኦውበሪ፡ ድሕሪ ምግላጻ፡ ኣብ ትሕቲ ቀይዲ ከእትውዎ ዘኽእሉ እኹላት ክስታት ኣለዉ ኢላ።
እዚ ክሱስ ናብ ማልም ከም እተመሓላለፈ፡ እንተኾነ ግና ነቲ ክሲ ኣሉታዊ መልሲ ከም ዝሃበሉ ተገሊጹ ኣሎ። ፖሊስ፡ ናይ ጥርጡር ስእሊ ኣውጺኦም እኳ እንተነበሩ፡ እታ ኣኽባሪት ሕጊ፡ እዚ ስእሊ ኣዝዩ ኣገዳሲ ከም ዘይኮነን ይኹን እምበር እቲ ኣብዚ ስእሊ ዘሎ ሰብ፡ ነቲ ኣብ ትሕቲ ቀይዲ ኣትዩ ዘሎ ሰብ ከም ዝመስል ብርክት ዝበሉ ጸብጻባት ገሊጾም።
ይኹን እምበር፡ እቶም ዝተኣከቡ ጭብጢታት፡ ኣብዚ ሕጂ እዋን፡ ብሚስጥር ንምዕቃብ ከም እትደሊ እታ ኣኽባሪት ሕጊ ገሊጻ።
