ኣብ ሽወደን ብክሮና ቫይረስ ከም ዝተጠቕዐ ዝጥርጠር ካልኣይ ሰብ ተረኺቡ።

ኣብ ከባቢ ብሊኪንግ ሓደ ብክሮና ቫይረስ ከምዝተለኽፈ ዝጥርጠር ሰብ ከምተረኽበን ኩነታቱ ብቐረባ ይከታተልዎ ከም ዘለዉን ሰብ መዚ ጥዕና ሽወደን ብ ሰሉስ ኣብ ዘውጸኦ መግለጺ ሓቢሩ። እዚ ብክሮና ቫይረስ ከም ዝተለኽፈ ዝተጠርጠረ ሰብ ኣብ ቻይና ቅድሚ 14 መዓልታት ከምዝነበረን ምልክታት ናይ ምስትንፋስ ጸገማት ብ ሰሉስ ከም ዝተርኣየን እቲ በዓል መዚ ገሊጹ። ውጽኢት ናይ መርመራ ካብ ረቡዕ ክረአ ምዃኑ ሓላፊ ምቁጽጻር ለበዳ ከባቢ ብሊኪንግ፡ ዶር በንጀት ዊትሱ ገሊጹ። ብክሮና ቫይረስ ከም ዝተለኽፈ እንተድኣ ተረጋጊጹ፡ ኣብ ምሉእ ሽወደን ከም ካልኣይ ኣጋጣሚ ኮይኑ ክምዝገብ እዩ።