ኣብ ምዕራብ ስቶክሆልም ብሰንኪ ዘጋጠመ ምፍንጃር ሓደ ሰብኣይ ጒድኣት በጺሕዎ።

ኣብ ምዕራብ ስቶክሆልም–ሃስልቢ– ኣብ ዝርከብ ህንጻ ብሰንኪ ዘጋጠመ ምፍንጃር ሓደ ሰብኣይ ጒድኣት ከም ዝበጽሖ
ተገሊጹ። እቲ ምፍንጃር ለይቲ ከባቢ ሰዓት 1:30 እዩ ኣጋጢሙ። በቲ ጎረባብቲ “ምንቅጥቃጥ ምድሪ እዩ ዝመስል” ዝበልዎ
ነውጺ ኣብ ታሕተዋይ ደርቢ ዝርከቡ መስትያታት ከም እተሰባበሩ ሬድዮ ሽወደን ጸብጺባ’ላ። እቲ መጒዳእቲ ዝበጽሖ ሰብኣይ
ንሕክምና ብኣየር ተላዒሉ ናብ ሆስፒታል ተወሲዱ’ሎ። ጎረባብቲ እቲ ህንጻ ክግዕዙ ከም እተገብረን እቲ ቦታ ኸኣ ብፖሊስ ይሕሎ፡
መሰኻኽር ከኣ ቃለመሕትት ይግበረሎም ምህላዉን ሬድዮ ሽወደን ወሲኻ ኣመልኪታ።
ኣብቲ ቦታ መርመራ ንምክያድ እተላእከት ሃገራዊ ጒጅለ ሃንደሳ ብስንኪ ክሳብ ሕጂ ዝወድቕ ዘሎ ፍርራስ ዘድሊ መርትዖታት
ክትእክብ ተሸጊራ ምህላዋ ገሊጻ’ላ። እዚ እናኾነ፡ ፖሊስ ብዙሓት ጥርጡራት ዝበልዎም ሰባት ኣብ ትሕቲ ቀይዲ ኣእትዮም
ኣለዉ። እዚ ምፍንጃር ምስ ጒጅለታት ገበን ምትእስሳር ኣለዎ ዶ የብሉን ኣብ ዝብል ሕቶ ፖሊስ ዛጊት ርእይቶ ካብ ምሃብ
ተቖጢቦም ኣለዉ።