ኣብ ምምሕዳር ብሊኪንየ፡ ሸውዓተ ሰባት፡ ብህንዳዊ ጅር ኮሮና ቫይረስ ተለኺፎም

ዝሓለፈ ሰሙን፡ ኣብ ሶልቭስቦሪ (Sölvesborg)፡ ሸውዓተ ሰባት፡ ብህንዳዊ ጅር ኮሮና ቫይረስ ከምተለኽፉ ምምሕዳር’ቲ ከባቢ ሓቢሩ ክብል ማዕከን ዜና ተተ ኣቃሊሑ።

እቲ ዝተራእየ መልከፍቲ፡ ኣብ ከም በዓል መዋእለ ህጻናት ዝርከብዎም ዝተፈላለዩ ከባቢታት ከምዝተራእየ ሰብ መዚ ጥዕና እቲ ምምሕዳር ይገልጹ።

እቲ ህንዳዊ ጅር፡ ኣብ ዝተፈላለዩ ቦታታት ኣስፋሕፊሑ ክህሉ ከምዝኽእልን በዚ ቫይረስ ዝልከፉ ተወሰኽቲ ሰባት ክህልዉ ከምዝኽእሉን ሓላፊ ምቁጽጻር ለበዳ ምምሕዳር ብሊኪንየ፡ ቤንትግት ዊተኾ፡ ኣብ ዝገበሮ ጋዜጣዊ መግለጺ ሓቢሩ።

እዚ ህንዳዊ ጅር፡ ዝተፈልየ ሕማም ኮቪድ-19 ዘስዕብ እኳ እንተዘይኮነ፡ ብቕልጡፍ ናይ ምስፍሕፋሕ ዓቕሚ ከምዘለዎ እዩ ዝንገር።

እዚ ሓድሽ ተርእዩ ዝሕብረና እንተድኣ ሃልይዎ፡ ለበዳ ኮሮና ጌና ከምዘይተዓወትናሉን ንምቅላሱ ድማ ቀጻሊ ጻዕሪ ከድልየና ምኳኑ እዩ ዝሕብረና ዘሎ ክብል፡ ዊትኾ፡ ኣዘኻኺሩ።