ኣሜሪካ፡ ንሓሙሽተ ኣብ ኣፍሪቃውያን ሃገራት ዝመደበሮም ግብረ ሽበራውያን፡ ኣብ ዝርዝር ጸሊም መዝገብ ከምዘእተወት ብመንገዲ ቤት ጽሕፈት ወጻኢ ጉዳያታ ኣቢላ ሓቢራ ክብል ማዕከን ዜና ተተ ገሊጹ።
ካብቶም ኣብ ዝርዝር ጸሊም መዝገብ ዝኣተዉ ግብረ ሽበራውያን፡ ቦኖማደ ማቹዱ ዑመር፡ ኣዛዚ ናይቲ ኣብ ሞዛምቢክ ዝርከብ ምስ ኣይሲስ ጥቡቕ ዝምድና ከም ዘለዎ ዝንገረሉ ጉጅለ፡ ክልተ ላዕለዎት ኣዘዝቲ ናይቲ ኣብ ማሊ ዝርከብ ጉጅለ ኮይኑ ምስ ኣልቓዒዳ ጥቡቕ ዝምድና ከምዘለዎ ዝንገረሉን ክልተ ላዕለዎት ኣዘዝቲ ናይቲ ኣብ ሶማል ዝርከብ ጉጅለ ኣልሸባብ ዝርከብዎም እዮም ክብል ኣንቶኒ ብሊንከን ሓቢሩ።
ኣብ ዝርዝር ጸሊም መዝገብ ምእታው ማለት፡ ንኹሉ ኣብ ኣሜሪካ ዝርከብ ንብረትን ጸጋታትን ናይቶም ሰባት፡ ምድስካልን ነቲ ብደረጃ ዓለም ዘካይድዎ ቁጠባዊ ምንቅስቓሳት ኣሸጋሪ ንምግባር ዝዓለመ እዩ።
