ኣመሪካ: ኣብ ልዕሊ ህዝቢ ትግራይ ጃምላዊ መቕተልቲን ጾታዊ መጥቃዕቲን ፈጺሙ እዩ ንዝበለቶ ኤርትራዊ ወተሃደራዊ ኣዛዚ እገዳታት ኣንቢራ ክብል ማዕከን ዜና ተተ ሓቢሩ።
እዚ ውሳነ ክፍሊ ግምጃ ኣመሪካ: ኣብ ልዕሊ ጀነራል ፍሊጶስ ወልደዮሃንስ ዝተጻዕነ ምዃኑ ተፈሊጡ’ሎ። ሰራዊት ኤርትራ ኣብቲ ኣብ ትግራይ ዝተኻየደ ኲናት ብሰፊሑ ከም እተሳተፈ ድሕሪ ዝተገብረ መጽናዕቲ እዩ እቲ ክፍሊ ኣብዚ ውሳነ በጺሑ ተባሂሉ’ሎ።
ኣብቲ ካብ ወርሒ ሕዳር ናይ ዝሓለፈ ዓመት ኣትሒዙ ኣብ ልዕሊ ትግራይ ዝተኣወጀ ኲናት: መንግስቲ ኤርትራ ንማእከላይ መንግስቲ ኢትዮጵያ ብምድጋፍ: ኣብ ልዕሊ ትግራይ ጃምላዊ መቕተልቲ ሲቪላውያንን ምድፋር ዓሰርተታት ኣሽሓት ደቀንስትዮን ራስያን ምቅጻልን ንብረት ተጋሩ ምክያዱ ጸብጻባት የመልክቱ ክብል እቲ ቤት ጽሕፈት ገሊጹ።
መንግስቲ ኤርትራ ነዚ ክሲታት ኣመሪካ መሰረት ዘይብሉ እዩ ክብል ብሚኒስትሪ ጒዳያት ወጻኢ እታ ሃገር ኣቢሉ ነጺግዎ’ሎ።
ሰራዊት ምክልኻል ትግራይ ካብ ወርሒ ሰነ ንደሓር ንዝበዝሐ መሬት ትግራይ ሓራ ከም ዘውጽኦ ዝፍለጥ እዩ።
