ኣመሪካ: ነባሪት ኣላስካ ብድቢ ትጥቃዕ

ሓንቲ ተቐማጢት ኣላስካ ኣብ ዓይኒ ምድሪ እናሃለወት ብድቢ ከም እተጠቕዐት ገሊጻ። ሻኖን ስቲቨንስ ኣብ ቀላይ ቺልካት ዝርከብ ምሕድግ ዝበለ ቤት ዓይኒ ምድሪ እናተጠቕመት ብዝገጠማ መጥቃዕቲ ድቢ ኣብ መቐመጫኣ ከም ዝቘሰለት ገሊጻ’ላ።

ንሳ ምስ ኣእወየት ሓዋ ከም ዘድሓናን ኣብቲ ዓይኑ ምድሪ ርእሲ ድቡ ምርኣዩን ገሊጹ። እንተኾነ እቲ ቊስላ ካብ መንከስቲ ድዩ ወይስ ምብሕጫር ከረጋግጽ ከም ዘይከኣለ ሓቢሩ።

ንሳ ቀዳመ ሰንበት ምስ ሓዋን ኣፍቃሪቱን ኣብ ዮርት ዝበሃል ፍሉጥ ቅዲ ህንጻ እቲ ዞባ ከተሕልፍ ኢላ ምስ መጸት እዩ እቲ ሓደጋ ኣጓኒፍዋ። ዝሓለፈት ምሸት መጋርያ ወሊዖም መረቕ የፍልሑ ምንባሮም ድማ ገሊጻ።

ነቲ ቊስሊ ቐድማይ ረድኤት ከም ዝገበረትሉን ንጽባሒቱ ኣብ ዙርያ እቲ ቤት ብርክት ዝበለ ኣሰር እግሪ ድቢ ምርካቦምን ድማ ሓቢራ።