ኢትዮጵያ፡ ሲቪላውያን ንኲናት ክኸቱ ጻውዒት ቀሪቡ

ኣብ ኢትዮጵያ፡ ኣብ ዝተፈላለያ ክልላት፡ ኲናት ይቕጽል ኣብ ዘለወሉ እዋን፡ ቀዳማይ ሚኒስተር ኢትዮጵያ፡ ኣብይ ኣሕመድ፡ ኲሎም ንዓቕመ ኣዳም ዝበጽሑ ዜጋታት፡ ናብ ውትህድርና ክጽንበሩ ጻውዒት ጌሩ’ሎ ክብል ማዕከን ዜና ተተ ሓቢሩ።

ኲሎም ንዓቕመ ኣዳም ዝበጽሑን ኣካላዊ ጥዕና ዘለዎምን ዜጋታት፡ ናብ ሓይልታት ምክልኻል ሃገር፡ ፍሉይ ሓይልታት ሚሊሻን ብምጽንባር ሃገራውነቶም ዘርእዩሉ ግዜ ኣኺሉ’ሎ” ክብል ቤት ጽሕፈት ቀዳማይ ሚኒስተር ኢትዮጵያ ኣብ ዘውጽኦ መግለጺ ሓቢሩ።

ኣብይ ኣሕመድ፡ በይናዊ ምቁራጽ ተዂሲ ካብ ዝእውጅ፡ ጌና ካልኣይ ወርሑ ከየቑጸረ እዩ፡ ቀዳማይ ሚኒስተር ኢትዮጵያ፡ ከምዚ ዝበለ ናይ ክተት ጻውዒት ዘውጽእ ዘሎ።

ሓይልታት ምክልኻል ትግራይ (TDF) ኣብ ምብራቕ ኢትዮጵያ (ክልል ዓፈርን) ንደቡብ ወገን ናብ ክልል ኣምሓራን ተኸታታሊ መጥቃዕታት ከካይድ ምጽንሑ ይፍለጥ።