(AP Photo/Carley Petesch, File) NIN102
ሓደ ካብቶም ኣዝዮም ጸለውቲ ኣፍሪቃያን ሰበኽቲ ዝኾነ ናይጀርያዊ ቲቢ ጆሹዋ፡ ኣብ መበል 57 ዕድሜኡ፡ ብቐዳም ከም ዝሞተ ተገሊጹ።
5 ሚልዮን ሰዓብቲ ዘለዉዋ ናይ ፌስቡክ ገጹ፡ ኣምላኽ ንኣገልጋሊኡ ወሲድዎ ኣሎ ክትብል ዕረፍቱ ሓቢራ’ላ። ሰዓታት ቀቅድሚ ሞቱ ብቐጥታ ዝመሓላለፍ ናይ ስብከት ኣገልግሎት ከም ዝሃበ ዝገለጸ እቲ ሓበሬታ ምኽንያት ሞቱ ዛጊት ኣይተረጋገጸን ኣሎ ኢሉ። ላዕለዎት ፖለቲከኛታት ኣፍሪቃ፡ ዝርከብዎም ዓሰርተታት ኣሽሓት ሰባት፡ ኣብ ቀብሩ ክሳተፉ እዮም ተባሂሉ’ሎ።
ዝሓለፈ ወርሒ ሚያዝያ፡ ጆሹዋ፡ ኣብ ልዕሊ ግብረሰዶማውያን ናይ ጽልኢ ስብከት ሂብካ ብዝብል ካብ ዩትዩብ ተኣጊዱ ምንባሩ ዝዝከር እዩ። ብዘይካ’ዚ፡ ጆሹዋ፡ መንፈስ ኣጋንንቲ ኣለዋ ብምባል ንሓንቲ ሰበይቲ እናጸፍዓ ዘርኢ ቪድዮ ካብ መርበቡ ምእላዩ እውን ይፍለጥ። ሞቱ ካብ እተሰምዓላ ሰዓት ኣትሒዙ፡ ንኽብሪ ጆሹዋ፡ ዝገልጹ መልእኽቲታት ኣብ ማሕበራዊ ሚድያ ኣብ ምውሓዝ ከም ዝርከቡ ተሓቢሩ’ሎ።
