ቻይናዊያን ጠፈርተኛታት: ድሕሪ 90 መዓልታት ናብ ምድሪ ተመሊሶም

ሰለስተ ቻይናውያን ጠፈርተኛታት: ኣብታ ሃገር ዝነውሐ ዝተባህለሉ ናይ ጠፈር ምብጻሕ ድሕሪ ምፍጻም: ናብ ምድሪ ተመሊሶም ኣለዉ። እዞም ጠፈርተኛታት ካብቲ ካብ ምድሪ 384 ኪሎሚትር ንሰማይ ዝርከብ መደብር ጠፈር ቻይና ቲያንሀ ን 90 መዓልታት ድሕሪ ምጽናሕ እዮም ንምድሪ ተመሊሶም ዘለዉ። እዞም ሰለስተ ሰብኡት በታ ሸንዙ-12 ዝተሰምየት መንኰርኰር ኣቢሎም እዮም ንምድሪ ተመሊሶም። ብመሰረት ግሎባል ቻይና ዝተባህለ ማዕከን ዜና እዞም ጠፈርተኛታት ኣብ ሰማይ እናሃለዉ ዝተፈላለተ ሳየንሳዊ ዕማማትን ምትሕልላፍ መልእኽቲን ፈጺሞም እዮም። ቻይና ኣብ ቴክኖሎጂ ጠፈር ዝያዳ ተመኲሮን ርእሰ ተኣማንነትን እናማዕበለት ትመጽእ ምህላዋ ሓደ መርኣያ እዩ ክብሉ ተንተንቲ ይገልጹ ኣለዉ።