ቲክ ቶክ . . . ንኣብ ሽወደን ዝርከቡ ተጠቀምቲ፡ ዝኸውን መምርሒታት ዘርጊሑ

ብናእሽቱ ቆልዑን መንእሰያትን ብዝሒ ተጠቃምነት ዘለዎ ኣገልግሎት ሞባይል፡ ቲክ ቶክ፡ ማእከል ውሕስነት (security center) ብቋንቋ ሽወደን ከምዝዘርገሐ ሓቢሩ ክብል ማዕከን ዜና ተተ ኣቃሊሑ።

ኣገልግሎት ሞባይል፡ ቲክ ቶክ፡ ተጠቀምቲ፡ ከም ናይ ሳዕስዒት፡ ሙዚቃ ዝኣመሰሉ ሓጸርቲ ቪድዮታት፡ ኣውሪዶም፡ ካልኦት ተጠቀምቲ ከምዝካፈልዎ ዝገብርሉ ኣገልግሎት እዩ። ኣገልግሎት ሞባይል፡ ቲክ ቶክ፡ ብቻይናዊ ናይ ቴክኖሎጂ ኩባንያ ቢትዳንስ ዝውነን ኮይኑ፡ ንመጀመርያ ግዜ ኣብ ዓመተ 2016 ኣብ ኣገልግሎት ከምዝወዓለ ይዝከር። ተጠቀምቲ ናይዚ ኣገልግሎት፡ 1 ቢልዮን ዝኣኽሉ ክኾኑ እንከለዉ፡ ልዕሊ 2 ሚልዮን ዝኾኑ ተጠቀምቲ፡ ኣብ ሽወደን ከምዝርከቡ ናይ ቀረባ እዋን ገምጋማዊ ጸብጻባት ይሕብሩ።

ስድራቤታት ንምሕጋዝ፡ ኣገልግሎት ሞባይል፡ ቲክ ቶክ፡ ኣብቲ መምርሒታት ናይ መጉዚት (Guardian’s Guide) ዝብል ዓምዲ፡ ዋን-ስቶፕ ሾፕ (one-stop shop)፡ ዝተባህለ ዓንቀጽ፡ ብዛዕባ ቲክ ቶክ ዘለዎም ኣፍልጦ ክብ ንኸብሉ ምእንቲ፡ ሓበሬታ ኣንቢሩ ይርከብ። ኣብቲ ዓምዲ፡ ብዛዕባ መድራኽ (platform)፡ ንውሕስነትን ብሕታውነትን ዘገልግሉ መሳሪሒታትን ዝምልከት ሓበሬታ ከምዘሎ፡ እቲ ኩባንያ ኣብ ዘካየዶ ጋዜጣዊ መግለጺ ሓቢሩ።