ኣብ ተፈታዊት ተኸታታሊት ፊልም፡ Game Of Thrones፡ ስቴፓ ኡኔላ ኮይና እተዋስአት ሃና ዋዲንሃም፡ ናይታ ለቢሳታ ዝነበረት ገጸ ባህርያት ኣማውታ፡ ዘዘንቱ ምርኢት ክስራሕ እንከሎ፡ ብዙሕ ስቓይ ከም ዘስዓበላ ገሊጻ። ንሳ ነዛ ምርኢት ንምድላው ዘሕለፈቶ ስቓይ እንክትገልጽ “ኣብ ጣውላ ንዓሰርተ ሰዓታት ዝኣክል እየ ተጋዲመ፡ ኣብ እዋን ሕርሰይ ገዲፍካ ከምዚ ዝበለ ስቓይ ወሪዱኒ ኣይፈልጥን እዩ። ሌና ናብ ገጸይ ደጋጊማ ወይኒ ከተፍስሰለይ ብዳይረክተር እኳ እንተተነግራ ንሳ’ውን ብዙሕ እያ ተሳቕያ፥ ናተይ ግደፎ ዳርጋ ሃለዋተይ ከጥፍእ እየ ደልየ ኔረ” ትብል። እታ ምርኢት ተመሊኣ ድሕሪ ምውዳኣ ብዘስዓበላ ስነኣእምሮኣዊ ጭንቀትን ክቱር ጽልኢ ማይን ናብ ክኢላ ስነኣእምሮ ትመላለስ ምንባራ እውን ገሊጻ። “ኣብዛ ፊልም ምውሳእ ናብ ከምዚ ዝበለ ጽልኢ ማይ ከቃልዓኒ’ዩ ኢለ ብፍጹም ኣይሓሰብኩን፥ ከቢድ ራዕዲ እዩ ናብ ከብድይ ኣትዩኒ። ንዓሰርተ ሰዓታት ማይ ናብ ገጸይ እናፈሰሰ ልምምድ ጌረ፡ ኣብ መወዳእታ ደቒቕን ፈረቓን እዩ መለገብታ ፊልም ክኸውን ተጌሩ። ኣብ ፊልም Game of Thrones ከምዚ ዝበለ ስቓይ ዘሕለፈት ሃና ጥራይ ኣይኮነትን። ኣብታ ፊልም ላንሰል ላኒስተ ኮይኑ ዝተዋስአ ዩጂን ሳይመን እውን ብዙሕ ስቅያት ምሕለፉ ተመኲሮኡ ኣካፊልዋ ምንባሩ ጠቒሳ።
