ተቓዉሞ ንመጥቃዕቲታት ኣንጻር ቤት ጽሕፈት ማሕበራዊ ጉዳያት ሽወደን።

መቕጸልታ ናይቲ ብመገዲ ማሕበራዊ መራኸቢ ብዙሓን ዝጀመረ ኣንጻር ኣሰራርሓ ቤት ጽሕፈት ማሕበራዊ ጉዳያት ሽወደን ዝግበር ዘሎ ጠቃኒ ካብ ሓቂ ዝራሓቐ ጸለመን ንምቅዋም ፣ ሎሚ ሰኑይ ኣብ ሰዓታት ድሕሪ ቀትሪ፣ ኣብ ኣፍደገ ባይቶ ሽወደን ናይ ተቓዉሞ ሰልፊ ተኻይዱ። 

እቲ ኣብ ልዕሊ ሰራሕተኛታት ኣብያተ ጽሕፈት ናይ ዝተፈላለያ ዞባታት፣ ዝቐንዐ ንተኸተልቲ ሃይማኖት ምስልምናን ሓዊስካ ኣብ ሓደ ዝተወሰነ ክፋል ሕብረተሰብን ደቆምን ብኣብያት ጽሕፈት ማሕበራዊ ጉዳያት በደልን ጭዉያ ቆልዑን ይካየድ ከምዘሎ ኣምሲልካ ዝካየድ ዘሎ ግጉይ ጎስጓስ፣ ሰራሕተኛታት ኣብ ቀጻሊ ፍርሒን ታህዲድን ንኽንበሩ ይገብር ብምህላዉ ዝምልከቶ ኣካል ስጉምቲ ክወስድ ከምዘሎዉ እቶም ሰልፈኛታት ከምዝጸዉዑ ግልጋሎት ዜና ሽወደን ተተ ሓቢሩ።  ነዚ ዝካየድ ዘሎ ጎስጓስ ዘዋሃህዱ ዘሎዉ ዝተፈላለየ ድሕረ ባይታ ዘሎዎም ጉጅለታት ብሰብ መዚ መንግስቲ ዝፍለጡ ከምዝኾኑን ኣብ ልዕሊ ሰራሕተኛታትን ኣብያተ ጽሕፈት ማሕበራዊ ጉዳያትን ከኣ ጉድኣት ክግበር ዝደፋፍ ሓደገና ተግባር ከምንዝኾነ ክፍለጥ ተኻኢሉ ኣሎ።