ተረፍ ኣርባዕተ ዝመሓውሩ ጥንታዊ ዓሳ ነባሪ ተረኺቡ

ኣብ ግብጺ ዝመደብሮም ተመራመርቲ: ቅድሚ 43 ሚልዮን ዓመታት ይነብር ዝነበረ ኣርባዕተ ዝመሓውሩ ዓሳ ነባሪ ምርካቦም ቢቢሲ ሓቢራ።

እዚ ተረፍ ዓሌት Phiomicetus: ኣብ ምዕራባዊ ምድረበዳ ግብጺ እዩ ተረኺቡ። እዚ ዝተረኽበ ሽክና ን ተዂላ ከም ዝመስል እቶም ተመራመርቲ ወሲኾም ገሊጾም።

ዘመናውያን ነበርቲ ዓሳ ኣርባዕተ መሓውር ካብ ዘለዎም ዓጋዜን ዝመስሉ ጥንታውያን ዓሌታት ብፍልቀት (Evolution) ከም ዝማዕበሉ ተመራመርቲ ይገልጹ።

እዚ 600 ኪሎን ኣስታት 3 ሜትሮን ዝዓቐኑ ጥንታዊ ኣባሓጎ ዓሳ ነባሪ ብርቱዕ ናይ ምንኻስ ሓይሊ ዘለዎ ኣስናን ከም ዝውንን Royal Society B ዘካየዶ መጽናዕቲ የመልክት። እዚ ዓሌት ብፍላይ ኣብ መሬት ብኣርባዕቲኡ መሓውሩ ዝንቅሳቐስ ኣብ ባሕሪ ከኣ ጽቡቕ ናይ ምሕንባስ ክእለት ዘለዎ ኣምፊብያን እዩ ኔሩ ክብል እቲ መጽናዕቲ ወሲኹ ገሊጹ’ሎ።

ኣብ ምድረበዳዊ ለጠቕታ ፈዩም ዝተረኽበ እዚ ኣዕጽምቲ ብ ተመራመርቲ ዩኒቨርሲቲ መንሱራ ተወሳኺ መጽናዕቲ ይካየደሉ ኣሎ። ለጠቕታ ፈዩም ሕጂ ምድረበዳ እኳ እንተኾነ ቅድሚ ሚልዮናት ዓመታት ብባሕሪ እተሸፈነ ምንባሩ ተመራመርቲ ስነ ምድሪ ይሕብሩ።