ኣብ ምምሕዳር ሄሊፎሽ ዝርከብ እንዳ መናበይ ዓበይቲ እትሰርሕ ሰበይቲ ናብ ፍርዲ ቀሪባ ተባሂሉ። እዛ ሰበይቲ መርምራ ገይራ ብቫይረስ ኮሮና ከምተለኽፈት ምስ ተሓበራ፡ ኩነታታ እናፈለጠት ናብ ስራሓ ከምዝኸደት ሬድዮ ሽወደን ሓቢሩ።
ቤት ጽሕፈት ኣኽባሪ ሕጊ፡ ነቲ ፍጻሜ፡ ኣብ ልዕሊ ካልኦት ሰባት ሓደጋ ዘውርድ ከቢድ ፈተነ መጥቃዕቲ ብዝብል ኣብ ልዕሊ እታ ሰበይቲ ክሲ መስሪቱ ኣሎ።
ሕማም ኮቪድ-19፡ ሓደገኛ ማሕበራዊ ሕማም ከም ምዃኑ መጠን፡ ብሰንኪ ፍጻሜ ናይዛ ሰበይቲ ገለ ሰባት በቲ ቫይረስ ክልከፉ ወይ ድማ ክሳብ ናይ ሞት ሓደጋ ከስዕብ ስለዝኽእል፡ ከቢድ ፈተነ መጥቃዕቲ ኢልናዮ ኣለና ክትብል ናይቲ ጉዳይ ህዝባዊ ኣኽባሪት ሕጊ፡ ኦሳ ሂዲንግ፡ ገሊጻ።
ምምሕዳር ሄሊፎሽ ነቲ ጉዳይ ብዝምልከት ዝኾነ ዓይነት ርእይቶ ካብ ምሃብ እኳ እንተተቖጠበ፡ እታ ሰበይቲ ካብ ስራሓ ከምተባረረት ግን ኣረጋጊጹ።
