ባይደን “ፑቲን ኣብ ስልጣን ክጸንሕ የብሉን” ምባሉ የዘራርብ ኣሎ

ፕረዚደንት ኣሜሪካ ጆ ባይደን ኣብ ርእሰ ከተማ ፖላንድ ዋርሶው ብዛዕባ ፕረዚደንት ሩስያ ቭላዳሚር ፑቱን ዝተዛረቦ ዘረባ ኣዘራራቢ ኮይኑ ኣሎ።

ጆ ባይደን ብዛዕባ ሩስያ ኣብ ልዕሊ ዩክረይን ዝካየደቶ ወራርን ብዛዕባ ፕረዚደንት ፑቲንን ኣመልኪቱ “እዚ ሰብ እዚ ኣብ ስልጣን ክጽንሕ የብሉን” ኢሉ ተዛሪቡ።

ዘረባ ጆ ባይደን፡ ኣሜሪካ ኣብ ሩስያ ናይ መንግስቲ ለውጢ ክህሉ ድሌትን ዓላማን ከምዘለዋ ዘርኢ’ዩ ክብሉ ብዙሓት ይትንትንዎ ኣለዉ።

ካብዚ ብተወሳኺ ዘረባ ጆ ባይደን፡ ኣብ ሞንጎ እተን ክልተ ሓያላት ሃገራት ዘሎ ሓርፋፍ ርክብ መሊሱ ከሻሕክሮ’ዩ ዝብሉ’ውን ኣይተሳእኑን።

እንተኾነ ድሕሪ መደረ ጆ ባይደን ዋይት ሃውስ ብዛዕባ እቲ ዘረባ መብሪሂ ሂቡ ኣሎ።

BBC TIGRINJA