ስቶክሆልም፥ ቀዳማይ መጋባእያ ናይቶም ብ ጎነጽ እተኸሱ ኣርባዕተ ሰባት ይካየድ ኣሎ።

ኣብ ቀረባ እዋናት ኣብ ከባቢ ስቶክሆልም ድሕሪ ዘጋጠመ ተዂሲን ምፍንጃራትን፡ ቀዳማይ መጋባእያ ናይቶም ምስዚ ጎነጽ
ብዝተሓሓዝ እተኸሰሱ ሰለስተ ኮተቴን ሓደ መንእሰይን ሕጂ ይካየድ ምህላዉ ተገሊጹ።
ሰለስተ ካብዞም ኮተቴ ኣብ በዓል ልደት ኣብ ስቶክሆልም ከባቢ ጉቤንገን ናብ ዝርከብ መንበሪ ኣባይቲ ብኦቶማቲክ ብረት ጠያይት
ብምትኳስ ተኸሲሶም ኣለዉ። እቶም ተኸሰስቲ ነቲ ገበን ኣይወዓልናዮን ብምባል ናይ እምነት ክሕደት ቃሎም ሂቦም ኣለዉ።
ክልተ ካብዞም ተኸሰስቲ ደቂ 15 ዓመት ኮይኖም፥ ካብ ኣባይቲ ክንክን ዝሃደሙን ፍሉጥ ኣድራሻ ዘይነበሮምን እዮም።
ሳልሰይቶም ምስ ኣዲኣ እትቕመጥ ዝነበረት ኮይና፥ ራብዓዮም ከኣ ኣብ ኖርታልያ ዝቕመጥ ወዲ 30 ዓመት መንእሰይ ምዃኑ
ፖሊስ ይሕብሩ።
ኣብ ወቕቲ ‘ዊንተር” ኣብ ከባቢ ስቶክሆልም ብጠቕላላ ልዕሊ 60 ምልውዋጥ ተዂሲ ከም እተገብረን ሸሞንተ ካብዚኣቶም
ቅትለት ከም እተፈጸሞም ፖሊስ ወሲኾም ሓቢሮም። ኣብ ገለ ካብዞም ንቕትለት ኣመልኪቶም ዝካየዱ ዘለዉ መርመራታት፡
ንኣብነት ኣብ እዋን ልደት ኣብ ሪንከቢ እተፈጸመ ቅትለት፡ ምንም ጥርጡራት ክሳብ ሕጂ ከም ዘይተታሕዙ ሬድዮ ሽወደን
ጸብጺባ’ላ።