ኣብ ዝሓለፈ ሰሙን፡ መጠን ሽቕለት ኣልቦነት ኣብ ሽወደን ከምዝወሰኸ ጸብጻባት ቤት ጽሕፈት ኣርቤስፎርሜድሊን ገሊጾም ክብል ማዕከን ዜና ተተ ሓቢሩ።
ኣብ ዝሓለፈ ሰሙን፡ ብዝሒ ዝተመዝገቡ ስራሕ ኣልቦ ዝኾኑ ሰባት፡ 412,600 ምብጽሑን እዚ ድማ ካብ ጠቕላላ ብዝሒ ሰራሒ ዓቕሚ፡ 8% ዝሽፍን ኮይኑ ካብቲ ኣብ ቅድሚኡ ዝነበረ ሰሙን ዝተመዝገበ 7.9% ዝዓበየ ከም ዝኾነ ተገሊጹ። ቀንዲ ምኽንያት ናይዚ ምውሳኽ ድማ፡ ክረምታዊ ዕረፍቲ ስለ ዝኾነ ብዙሓት ሰባት ናብ ዕዳጋታት ስራሕ ንኽጽምበሩ ስለ ዝተመዝገቡ እዩ ክብል እቲ ጸብጻብ ብምውሳኽ ገሊጹ።
ኣብዚ ሰሙን እዚ፡ 3000 ዝኾኑ ኣብ ክሊ ዕድመ 18 ክሳብ 24 ዝርከቡ መንእሰያት፡ ተወሰኽቲ ስራሕ ኣልቦ ኮይኖም ኣለዉ። በዚ ድማ መጠን ስራሕ ኣልቦ ዝኾኑ መንእሰያት ካብ 10.1% ናብ 10.5% ክብ ከምዝብል ገይሮም ኣለዉ።
ኣስታት 1300 ዝኾኑ ሰራሕተኛታት ካብ ስራሕ ናይ ምስንባት መጠንቀቕታ ተዋሂብዎም ከምዘሎ፡ ጸብጻባት እቲ ቤት ጽሕፈት ይሕብሩ።
