ሩስያ ኣብ ምብራቓዊ ዩክረይን ሓድሽ መጥቃዕቲ ከፊታ – ቮሎድሚር ዘለንስኪ

ሩስያ ምብራቓዊ ዞባ ዶምባስ ንምቁጽጻር መጥቃዕቲ ከምዝኸፈተት መራሒ ዩክረይን ቮሎድሚር ዘለንስኪ ገሊጹ፡፡

ሞስኮ ትማሊ ሰኑይ ከተማታት ብሮኬትን ከበድቲ ኣጽዋርን ዝደብደበት ኮይና ዘለንስኪ ብቪድዮ ኣብ ዝዘርገሖ ሓበሬታ ‘‘ዶንባስ ንምሓዝ ዝግበር ኲናት’’ ተጀሚሩ ኢሉ፡፡

ላዕለዋይ በዓል መዚ ድሕነት ዩክረይን ኦለክሲ ዳኒሎቭ እውን ሩስያ ኣብቲ ግንባር ዘሎ ምክልኻል ሰራዊት ዩክረይን ሰይራ ንምእታው ከምዝፈተነት ገሊጹ፡፡

ሩስያ ንርእሰ ከተማ ዩክረይን ኪቭ ንምቁጽጻር ዝገበረቶ ፈተነ ከይሰመረ ምስተረፈ ገጻ ናብ ምብራቕ ዩክረይን ከም እትገብር ትጽቢት ተገይሩ ነይሩ እዩ፡፡

ኣብ ፈለማ ድልየት ሞስኮ ንዓበይቲ ከተማታት ዩክረይን ተቖጻጺራ ነቲ መንግስቲ ምዕላው እዩ ነይሩ፡፡

ከቢድ ምክልኻል ምስ ኣጋጠማ ግና ወታሃደራዊ ሰብመዚ ሩስያ ቀዳማይ ዙር ወፍሪ ኣዐዊቶም ሓይልታቶም ካብታ ከተማ ከምዝሰሓቡ ገሊጾም፡፡

ቀጺሎም ዕላማ ናይቲ ወራር ኣብ ዶንባስ ንዝርከቡ ተዛረብቲ ቋንቋ ሩስያ ‘‘ሓራ’’ ናብ ምውጻእ ከምዘዘርዎ ኣፍሊጦም፡፡