ሩስያ ሲቪላት ሰባት ንክሃድሙ ተኹሲ ደው ከብል እየ ኢላ

ንፁሃት ሰባት ብምቕታል ክትኽሰስ ዝፀንሐት ሩስያ፡ ኣብ ዝተፈላለዩ ከተማታት ዩክረይን ዝርከቡ ሲቪላት ንክሃድሙ ተኹሲ ደው ከምእተብል ኣፍሊጣ።

ሰራዊት ምክልኻል ሩስያ እቲ ተኹሲ ደው ምባል ካብ ረፋድ ሰዓት 4፡00 ከምዝጅምር ኣፍሊጡ።

ከም ፀብፃብ መራኸብቲ ሓፋሽ እታ ሃገር፡ ሩስያ ኣብ ዝተፈላለዩ ከተማታት ዩክረይን ሰብኣዊ ኮረድዮ ክትኸፍት እያ።

ኣብ ርእሰ ከተማ ኪቭ ሓዊሱ፡ ኣብ ካርኪቭ፣ ማሪዮፖልን ሱሚን ተኹሲ ደው ከምዝብል’ዩ ተገሊፁ ዘሎ።

እዘን ከተማታት ኣብዚ እዋን ኣብ ከቢድ መጥቃዕቲ ሩስያ እየን ዝርከባ።

እንተኾነ ኣብዚ ጉዳይ ካብ ሰብመዚ ዩክረይን መረጋገፂ ኣይተረኸበን።

ኣብ መወዳእታ እዚ ዝሓለፈ ሰሙን፡ ኣብ ደቡባዊ ምብራቕ ማሪዮፖል ሲቪላት ንክወፅኡ ክልተ ግዘ ዝተገበረ ፈተነ ኣይሰመረን።

ሰብመዚ ዩክረይን፡ ሩስያ ኣብ ግዘ ተኹሲ ደው ምባል ንከተማ ማሪዮፖል ምድብዳብ ብምቕፃላ፡ እቲ ፈተነ ከምዘይተሳኽዐ ገሊፆም።