ሩስያ ኣብታ ድሕሪ ሞስኮ ዝዓበየት ከተማኣ：ሴንት ፒተስበርግ： ሻምፕዮን ኲዕሶ እግሪ ኣውሮጳ ከተእንግድ እያ ኣብ ዝበሃለሉ ዘሎ እዋን： ለበዳ ኮቪድ-19 ብናህሪ ወሰኽ የርኢ ምህላዉ ይግለጽ ኣሎ።
ኣብ ሩስያ ተኸሲቱ ዘሎ ለበዳ ብብዝሒ ምስቲ ዓሚ ኣጋጢሙ ዝነበረ ከም ዝመሳሰል ሰብመዚ ሩስያ ገሊጾም ኣለዉ። ኣብ ሞስኮን ከባቢኣን ልዕሊ 20 ሚልዮን ሰባት ከም ዝነብሩ ዝፍለጥ ኮይኑ ኣብ ጽላታት መራኸቢታትን መስተንግዶን ግዱድ ክትባት ተኣታትዩ ምህላዉ ቢቢሲ ሓቢራ።
ሩስያ ካብተን ኣቐዲመን ክትባት ኮቪድ-19 ምምሃዘን ዝፍለጣ ሃገራት ምስ ምዃና እዚ ኲነታት ምግጣሙ ምስ ድዂም ምቕርሐ እዚ ክትባት ዘጋጠመ ምዃኑ እዩ ዝግለጽ ዘሎ።
ኣብ ሰፊሕ መሬት ሩስያ ዝተፈላለየ ሕጊታት ምክልኻል ኮቪድ ከም እተኣታተወ ዝፍለጥ እዩ።
