ሓድሽ ናይ ኮምፒተር ፕሮግራም፡ ናብ ናይ ሽወደን ሞባይላት ምብጽሑ ተፈሊጡ። ዕላማ ናይዚ ፕሮግራም፡ ሓበሬታ ናይተን ኣብ ፈቖድኡ ብጌጋ ዝተዓሸጋ ናይ ኤሌክትሪክ ስኩተራት፡ ናብ ቤት ጽሕፈታት ትራፊክን ቤት ጽሕፈት ኣስራሕትን ጸብጻብ ቦተአንን ዓይነተንን ዝሕብር ምዃኑ ዮቶቦሪ ፖስተን (Göteborgs-Posten) ሓቢሩ።
እዚ ፈልስፓርከራድ (Felsparkerad) ዝተባህለ ሓድሽ ፕሮግራም፡ መኽሰብ ዘይብሉ ፕሮጀክት ኮይኑ ብኣንድርያስ ካርልሶንን ኦስካር ለማን ዝፈረየ እዩ።
እቲ ፕሮግራም፡ ኣብ ስቶክሆሎም፡ ንመጀምርታ ግዜ ኣብ ጥቕሚ ምስ ወዓለ፡ ኣብ ሒደት መዓልታት ኣስታት 10 ሽሕ ጸብጻባት ከምዘመሓላለፈ ይዝከር። ኣብዚ ሕጂ እዋን፡ ኣብ መላእ ሽወደን ዝርከባ፡ ኣገልግሎት ናይ ኤሌክትሪክ ስኩተራት ዘለወን ከባቢታት፡ ይጥቀምሉ ምህላወን ይፍለጥ። ኖርወይን ደኒማርክን ውን ነዚ ፕሮግራም ክጥቀማሉ መደብ ከምዘለወን ጸብጻባት ይሕብሩ።
