ብሰንኪ ምንቁልቋል ዶላርን ኣብ መንጎ ኣሜሪካን ቻይናን ተኸሲቱ ዘሎ ወጥርን፡ ዋጋታት ወርቂ ሰማይ ምዕራጉ ተፈሊጡ። ዋጋ ሓደ ኦንዝ (28.35 ግራም) ድማ ክሳብ 1938 ዶላር ምብጽሑ እዚ ድማ ዋጋ ሓደ ኪሎ ወርቂ ክሳብ 545 ሽሕ ክሮነር ዝበጽሕ ምዃኑ TT ሓቢሩ።
ኣብ እዋን ቅልውላው፡ ኣብ ወርቂ ዝግበር ወፍሪ እቲ ዘተኣማምን ወፍሪ እዩ ክብሉ ክኢላታት ይገልጹ። ዋጋታት ናይ ብሩርን ፕላቲንዮምን ዝኣመሰሉ ክቡራት ማዕድናት ውን ከምዝወሰኸ ዕዳጋታት ኣክስዩን ሓቢሮም።
ኣብዚ ሕጂ እዋን፡ ኩሎም ኣውፈርቲ፡ ንምንቅስቓስ ኣሜሪካዊ ፈደራላዊ ካዝና ብቐረባ ይከታተሉ ኣለዉ። ፈደራላዊ ባንክ፡ ገንዘባዊ ፈሰስ እንተድኣ ገይሩ፡ ዋጋታት ወርቂ ልዕሊ 2000 ዶላር ክበጽሕ ከምዝኽእል ተንተንቲ ይሕብሩ።
