ምስፍሕፋሕ ቫይረስ RS፡ እናወሰኸ ምምጽኡ ተገሊጹ

ኣብ ገዛ፡ ትሕቲ 6 ወርሒ ዝዕድሚኡ ዕሸል ዘለዎም ስድራቤታት፡ ነቶም ተማሃሮ መዋእለ ህጻናት ዝኾኑ ደቆም፡ ናብ ቤት ትምህርቲ ክልእክዎም ከምዘይብሎምን ኣብ ገዛ ከጽንሕዎም ከምዝግባእን ኣብ ምምሕዳር ቬስትራ ዮትላንድ ዝርከብ ተቖጻጻሪ ጥዕና ህጻናትን ለበዳን ንዮተቦሪ ፖስተን ኣብ ዝሃቦ ምብርሂ ገሊጹ ክብል ማዕከን ዜና ተተ ሓቢሩ።

ምኽንያት ናይዚ ለበዋ ድማ፡ ብሰንኪ ቅልጡፍ ናይ ለበዳ ባህሪያት ዘለዎ ቫይረስ RS፡ ኣብ ጽላት ሕክምና ዘስዓቦ ወጥሪ ምዃኑ ተፈሊጡ ኣሎ።

መልከፍቲ ቫይረስ RS፡ ኣብ ስርዓተ ምስትንፋስ ወዲ ሰብ፡ ረኽሲ ክፈጥር ዝኽእል ቫይረስ ከምዝኾነ፡ ክኢላታት ይገልጹ። እዚ ቫይረስ፡ ንትሕቲ 6 ወርሒ ዝዕድሚኦም ዕሸላት፡ ብጣዕሚ ሓደገኛ ስለ ዝኾነ፡ ስድራቤታት፡ ብዝተኻእለ መጠን፡ ነቶም ተማሃሮ መዋእለ ህጻናት ዝኾኑ ደቆም፡ ኣብ ገዛ ከጽንሕዎም ይግባእ ክብል ሓኪም ተመሓላለፍቲ ሕማማት፡ ቶማስ ዋሃልበሪ ሓቢሩ።