ቀዳማይ ሚኒስተር ሽወደን ስቲፈን ሉቨን ንሚኒስተር ዕዮ ዬልቫ ጆሃንሰን ኮሚሽነር ኤውሮጳዊ ሕብረት ክትከውን ሓጽዩዋ። ሓሙስ ኣብ ስቶክሆልም ኣብ ዝተገብረ ጋዜጣዊ ዋዕላ እዩ እዚ ዝተባህለ። ሉቨን ኣብቲ ዋዕላ እዛ ሚኒስተር ኣዝያ ምኲርቲን እዚ ማዕርግ ዝግባኣን ምዃኑ ኣመልኪቱ’ሎ። እታ ሚኒስተር ብወገና ሓጐሳ ብምግላጽ ብናይ ዕዮ ሚኒስትርነታ ዕግብቲ ምዃና ገሊጻ’ላ።
በዚ ድማ ጆሃንሰን ነታ 10 ዓመታት ዘገልገለት ሴሲልያ ማልስትሮም ብምትካእ ነዚ ቦታ ክትሕዝ እያ። ሽወደን ዝዓበየ ተራ ክትጻወት ድሌት ከም ዘለዋ ሉፈን ገሊጹ’ሎ። ብግብሪ ኤውሮጳዊ ኮሚሽን ከም ኤውሮጳዊ መንግስቲ ከም ዝዓዪን እማመታት ብምቕራን ፖሊሲ ኣብ ምቅራጽ እዙዝ ተራ ከም ዘለዎ ይፍለጥ።
