ሕብረት መሰል ደቀንስትዮ ኣብ ልዕሊ ደቀንስትዮ ዝወርድ ጎነጽ ኣመልኪቱ ንመንግስቲን ሓጋጊ ኣካልን ወቒሱ። “ኣብ ልዕሊ ደቀንስትዮ ዝወርድ ግፍዒ ናይ ምቕባል ረጒድ ቆርበት ኣማዕቢልና ኣሎና” ክትብል ሰክሬታሪ ጀነራል እፊ ውድብ ኦልጋ ፒርሰን ብሰንበት ምስ ተሌቪዥን ሽወደን ኣብ ዝነበራ ጻንሒት ገሊጻ። ንሳ መንግስቲ ኣካላት ሕጊን ነዚ ኣብ ምክልኻል እዂል ተግባራት ኣብ ምፍጻም ሰኒፈን ኣለዋ ክትብል ወቐሳኣ ኣቕሪባ’ላ።
ኣብ ተመሳሳሊ ፕሮግራም ሚኒስተር ውሽጣዊ ጒዳያት ሚካኤል ዳምበርግ ኣብ ልዕሊ ደቀንስትዮ ዝወርድ ምግፋዕ ከም ገበን ክረአ ኣለዎ ድሕሪ ምባል መንግስቲ ከምዚ ዝበለ እማመ ዘለዎ ኣካል ንኽሰምዕ ኣዝዩ ድሉው እዩ ኢሉ። “ኣዝዩ ምዕቡል ሕጊ ኣሎና–እቲ ሽግር ኣብ ትግበራ እዩ ዘሎ” ድሕሪ ምባል ኣብዚ ዓመት ነዚ ጋግ ንምምሕያሽ ጻዕሪን ክግበር እዩ ኢሉ።
