ኣብ ዓመተ 2019፡ መጠን ብዝሒ፡ ትሑት ቁጠባዊ ዓቕሚ ዘለዎም ሽወደናውያን (ድኻታት)፡ ናብ ዝተሓተ ደረጅኡ ምብጽሑ ማዕከን ዜና ተተ ሓቢሩ።
ጸብጻባት ቤት ጽሕፈት ቆጸራ ህዝቢ (SCB) ከምዝሕብሮ፡ ልዕሊ 15% ካብ ተቐማጦ ሽወደን፡ ኣብ ድኽነት ከምዝነብሩ ገሊጹ።
እቲ ጸብጻብ ከምዝሕብሮ፡ እተን ቀንዲ ብድኽነት ዝሳቐያ፡ እተን ንበይነን ዝነብራ፡ ልዕሊ 80 ዓመት ዝኾና ደቂ ኣንስትዮ ኮይነን እቲ መጠን፡ ክሳብ 41% ናይዘን ደቂኣንስትዮ ምዃኑ ክግለጽ እንከሎ፡ እቶም ኣብ ክሊ ዕድመ 0 ክሳብ 19 ዘለዉ ህጻናት ድማ 20% ካብዚኣቶም ብድኽነት ዝሳቐዩ እዮም።
ኣብ መንጎ ሰባት ዝተራእየ ፍልልይ መጠን እቶት፡ ኣብ ዓመተ 2019፡ ብውሑድ ዓቐን ክውስኽ እንከሎ፡ ካብቲ ካብ ዓመተ 2015 – 2017 ዝነበረ ፍልልይ ግን ዝተሓተ ምዃኑ እቲ ጸብጻብ ገሊጹ።
ኣብ ትሑት ቁጠባዊ ዓቕሚ ዘለዎም ሰባት፡ ማለት፡ መነባብሮኦም ካብቲ ማእከላይ ገምጋም ቁጠባዊ ዓቕሚ መነባብሮ ብ60% ዝተሓተ ምስ ዝኸውን እዩ ክብል ቤት ጽሕፈት ቆጸራ ህዝቢ ገሊጹ።
