ጆርጅ ፍሎይድ: ብበዓልመዚ ፖሊስ እናተቐትለ ብኣካል ኣብኡ ኔራ ብቪድዮ ዝቕረጸት መንእሰይ ፍሉይ ሽልማት ጋዜጠኝነት ፑሊትዘር ተሸሊማ። 18 ዝዕድሜኣ ዳርኔላ ፍሬዘር: ዝሓለፈ ዓመት 25 ግንቦት ምስ ኣሞኣ ኣብ ሚንያፕለስ ኣብ ዝነበርትሉ እዋን እያ ነቲ ፍጻመ ብ ቪድዮ ክቕረጽ ጌራ። በዚ ድማ በቲ ተባዕ ተግባር ነዚ ሽልማት ከም ዝበቕዐት እቲ ቦርድ ገሊጹ’ሎ።
እታ ዝቐርጸታ ቪድዮ ኣንጻር እቲ ኣብ ልዕሊ ጸለምቲ ኣመሪካውያን ዝወርድ ዓሌታዊ ኣድልዎ ዝግበር ቃልሲ ንምሕጋዝ ዓብዪ ተራ ከም ዝነበራ ዝገለጸ እቲ ሓበሬታ በዓልመዚ ፖሊስ ደረክ ሾቪን በዚ መርትዖ ፍርዱ ክቕበል ክኢሉ ኣሎ ኢሉ።
እቲ ግዳይ ነቲ ፖሊስ ምትንፋስ እኽእል የለኹን እናበለ ክምሕጸኖ ምስ ረኣኹ ነቲ ፍጻመ ብቪድዮ ክቐድሖ ጀሚረ ትብል–ዳርኔላ። እቲ ጭካነ ዝመልኦ ፍጻመ ብእካል ምዕዛባ ንህይወታ ከም ዝቐየሮ እውን ንቤት ፍርዲ ኣብ ዝሃበቶ ምስክርነት ጠቒሳ።
ፑሊትዘር ኣብ ኣመሪካ ዝለዓለ ሽልማት ጋዜጠኛታት ምዃኑ ይፍለጥ።
