ሰልፊ ስቫርያ ዴሞክራት ኣብ ኣብያተ ትምህርቲ ሽውደን ዘሎ ጽሬት ትምህርቲ ንምምሕያሽ ዘኽእል እማመ ኣቕሪቡ ተባሂሉ። እዚ እማመ ፍሉይ ሽግራት ንዘለዎም ተመሃሮ ብፍላይ ድማ ነቶም ኣብ ገበን ዝዋፈሩ ተመሃሮ ንኻልኦት ተመሃሮ ሓደጋ ስለዝዀኑ መንግስቲ ፍሉይ ሓላፍነት ክወስድ ጸዊዑ። ጸሓፊ እቲ ሰልፊ ካርልስክሮና ሪቻርድ ጋምሾፍ ንጋዜጣ ስቨንስካ ዳግብላዴት ኣብ ዝሃቦ ምጒታዊ ዓንቀጽ እዩ እዚ ሽግር ንምእላይ መንግስቲ ንጡፍ ስጒምቲ ክወስድ ጻውዒት ዝገብረ።
ኣብዚ ዓንቀጽ ኣብ መዳለዊ (ፕሪፓራቶሪ) ዘለዉ መጻእተኛታት ክሳብ ቋንቋ ሽወደን ኣጸቢቖም ዝመልኩ፥ ዕድል ካልኦት ተመሃሮ መታን ከየበላሽዉ ካብቶም ነባራት ክፍለዩ ድማ ጻውዒቱ ኣቕሪቡ’ሎ። ብዘይካዚ ኣብ ኣብያተ ትምህርቲ ሕጊ ዲቪዛ ክተኣታቶ፥ ንመማህራን ስልጣን ዝህብ ኣገባብ ክህሉን ዲሲፕሊን ክሰፍን ዝሕግዝ ስርዓተ ምሕደራ ክረጋገጽ ብኡኡ ኣቢሉ ድማ ኣብ ምምሃር ምስትምሃር ዘሎ ሃዋሁ ክመሓየሽን ዘለዎ እማመ ኣስፊሩ’ሎ።
