ቀዳማይ ሚኒስተር ሊብያ፡ ዓብደልሓሚድ ድቤይበ፡ ትማሊ ሰኑይ፡ ናብ ቤንጋዚ ክገብሮ ሓሲቡ ዝነበረ ጒዕዞ ብሰንኪ ዕጡቓት ኣብ መዓርፎ ነፈርቲ ዝገብርዎ ዕግታ ተኣጓጒሉ ከም ዝተረፈ ኣልጀዚራ ጸብጺባ።
ደገፍቲ ኮማንደር፡ ኻሊፋ ሓፍጣር፡ ዝኾኑ ዕጡቓትን ሲቪላውያን ወኪላት መንግስቲ፡ ናብታ ከተማ ከይኣትዉ ምኽልካሎም ድማ ተፈሊጡ። በዚ ድማ እቶም ወኪላት ናብ ትርቡሊ ክምለሱ ከም እትገብረ እቲ ጸብጻብ ወሲኹ ኣረዲኡ።
እዚ ትማሊ ሰኑይ ክካየድ እተሓስበ ኣኼባ፡ ገስጋስ ሕብረት መንግስቲ፡ ንምግላጽን ኣብ መንጐ ዕጡቓት ጒጅለታት ዘሎ ፍልልያት ንምሽምጋልን ዝዓለመ እዩ ኔሩ። እዚ ልኡኽ ብርክት ዝበሉ ሰብመዚ ጸጥታን ሓለዋ ቀዳማይ ሚኒስተርን ካልኦት ኣባላት መንግስቲን ከም ዝነበርዎን ንሓደ ስሙ ከይርቋሕ ዝደለየ ምንጪ ብምጥቃስ ኣልጀዚራ ሓቢራ።
ኣፈኛ ቀዳማይ ሚኒስተር ሊብያ፡ መሓመድ ሓሙዳ፡ ብሰንበት ኣብ ማሕበራዊ ሚድያ ኣብ ዝለጠፎ ሓበሬታ፡ እዚ ጒዕዞ ከም እተወዘፈ ገሊጹ’ሎ። እንተኾነ ግና ካልእ ዝኾነ ተወሳኺ ሓበሬታ ኣይሃበን።
