ህንዲን ቻይናን: ሰራዊተን ካብ ዘሰሓሕብ ዶብ ይስሕባ

ህንዲን ቻይናን ሰራዊተን ካብቲ ዘሰሓሕበን ዶብ ሂማላያ ናብ ምስሓብ መስርሕ ምውድአን ሚኒስትሪ ምክልኻል ህንዲ ኣብ ዘውጽኦ መግለጺ ሓቢሩ።

ሰራዊት ክልቲአ ሃገራት ብ ቐዳም እዮም ካብቲ ፖንጎንግ ጾ ዝተባህለ ቀላይ ስሒቦም ዘለዉ ክብል እቲ መግለጺ ወሲኹ ኣብሪሁ።

ብሰንኪ ኣብዚ ብግቡእ ዘየተመልከተ ዶብ ዘጋጠመ ግርጭት ኣብ ዝሓለፈ ሰነ 24 ሰባት ምሟቶም ጸብጻባት የመልክቱ። ክልቲኣተን ሃገራት ኣብ ካልእ ክፋላት እቲ ዶብ ዘሎ ወጥሪ ከህድኣ ተሰማሚዐን ኣለዋ ተባሂሉ።

እዚ ካብ ዘሰሓሕብ ዶብ ሰራዊት ናይ ምንስሓብ ስምምዕ ኣብ 11 ለካቲት ዝተበጽሐ ኮይኑ እዚ ስርሒት ብኸመይ ይሳለጥ ምህላዉ ንምግምጋም ብቐዳም ምዝታዮም ቢቢሲ ጸብጺባ።

ክልቲኣተን ሃገራት ነቲ ስሉጥ ምንስሓብ ብኣዎንታ ምግምጋሞም ፥ እንተኾነ ግና ኣብ ካልኦት ክፋላት እቲ ናይ ሓባር ዶብ ውጥረት ምህላዉ ምግንዛቦም እውን ተመልኪቱ።

እዚ ዶባዊ ሽግርን ወጥርን ንምፍታሕ ቀጻሊ ዘተን ልዝብን ከም ዘድልዮም ክልቲኣቶም ተሰማሚዖም ኣለዉ።