ሃገረ ፈረንሳ፡ ንትሕቲ ዕድመ መንእሰያት ዝኸውን ክታበት ኮሮና ትቕርብ

ንኹሎም ኣብ ክሊ ዕድመ 12 ክሳብ 18 ዓመት ዝርከቡ ትሕቲ ዕድመ ዝኾኑ መንእሰያት፡ ዝኸውን ጸረ ኮቪድ ክታበት፡ ካብ ዕለት 15 ሰነ 2021 ጀሚሩ ድሉው ክኸውን ምዃኑ ፕረዚደንት ኢማኑኤል ማክሮን ኣዊጁ ክብል ማዕከን ዜና ተተ ኣቃሊሑ።

50% ካብ ልዕሊ ዕድመ ዝኾኑ ፈረንሳውያን፡ ብውሑዱ ሓንቲ እብረ ክታበት ኮቪድ ከምዝተኸትቡ፡ ማክሮን፡ ኣብ ከተማ ሳን ሰርክለፑፒ (Saint-Cirq-Lapopie) ምብጻሕ ኣብ ዘካየደሉ እዋን ኣብ ዝሃቦ ቃል ሓቢሩ።

ሃገረ ፈረንሳ፡ ቀይድታት ኮሮና ንምፍካስ፡ ኣብ’ዚ ቀረባ እዋን፡ ሳልሳይ መድረኽ ከምዝበጽሐት ይፍለጥ። ቤት መግብታትን እንዳ ሻሂን፡ ናይ ደገ ኣገልግሎት ክህባ ከምዝጀመራን ካብ ሰነ 9 ጀሚረን ድማ ናይ ውሽጢ ገዛ ኣገልግሎት ክህባ ምዃነን ተፍለጡ ኣሎ።

መጠን መልከፍቲ ኮሮና እናወሓደ ይመጻሉ ኣብ ዘሎ እዋን፡ ኣብ ዝሓለፉ ሳምንታት፡ ኣብ ሆስፒታላት ዘጋጥም ዝነበረ ጸቕጢ ክጎድልን ቁጽሪ ናይቶም ኣብ ጽዑቕ ሕክምናዊ ምክትታል ዝእለዩ ሕሙማት ክውሕድ ከምዝተራእየ፡ ጸብጻባት ሓቢሮም።