ደራፋይ R&B ዘዊክንድ ንግዳያት ቅልውላው ትግራይ ንምሕጋዝ ሓደ ሚልዮን ዶላር ክልግስ መብጽዓ ምእታዉ ቢቢሲ ሓቢራ።
ሓቀኛ ስሙ፡ ኣቤል ተስፋይ፡ ዝተባህለ ካናዳዊ ደራፋይ፡ መበቈሉ ኢትዮጵያዊ ኮይኑ፡ ኣብ ኢትዮጵያ ዘለዉ ህዝበይ፡ ካብ ቆልዑ ክሳብ ሽማግለ፡ ብዘይምኽንያት ይቕተሉ ምህላዎም ኣዝዩ እዩ ዘሕዝነኒ ክብል ከምተዛረበ ይፍለጥ።
ቀዳማይ ሚኒስተር ኢትዮጵያ፡ ኣብይ ኣሕመድ፡ ኣብ ልዕሊ ክልል ትግራይ፡ ኲናት ካብ ዝጅምር ንደሓር፡ ብርክት ዝበለ ምግሃስ ሰብኣዊ መሰላትን ምርሻንን ከም ዝተኻየዱ ኣህጒራውያን ውድባትን ማዕከናት ዜናታትን ክጽብጽባኦ ጸኒሐን ኣለዋ።
ዝሓለፈ ሰሙን ሓደ ጸብጻብ ቢቢሲ ኣብ ከባቢ ማሕበረ ዴጎ ዝተባለት ከተማ ብውሕዱ 15 ዝኾኑ ዘይዓጠቑ ተጋሩ ሲቢላውያን ብሰራዊት ኢትዮጵያ ብግፍዒ ከም እተረሸኑ ምርግጋጹ ዘርኢ ዜና ምፍናዉ ዝዝከር እዩ።
ኣብ ትግራይ ተኸሲቱ ብዘሎ ኲናትን ሓፈሻዊ ቅልውላውን ክልተ ሚልዮን ህዝቢ ተፈናቒሎም ልዕሊ 4.5 ሚልዮን ከኣ ተጸበይቲ ረድኤት ኮይኖም ምህላዎም ይፍለጥ። ዘ ዊክንድ ዘወፍዮ ገንዘብ ናብ ፕሮግራም መግቢ ዓለም ው/ሕ/ሃ ክኣቱ ምዃኑ ተገሊጹ’ሎ።
