ኣመሪካ . . . ሩስያ፡ ንዩክሬይን እንተወሪራ፡ ተሪር ግብረመልሲ ንምሃብ ተዳልየ ኣለኹ ትብል

ሩስያ ን ዩክሬይን እንተወሪራ፡ ኣመሪካ ተሪር ግብረመልሲ ንምሃብ ተዳልያ ምህላዋ ፕረሲደንት ኣመሪካ ጆ ባይደን ምስ መዘናኡ ሩስያዊ ቪላድሚር ፑቲን ድሕሪ ዘካየዶ ዝርርብ ገሊጹ ክብል ማዕከን ዜና ተተ ኣቃሊሑ።

ኣብዚ ብቪድዮ ዝተኻየደ ዝርርብ፡ ባይደን፡ ሩስያ ኣብ ዶባት ዩክሬይን እትገብሮ ዘላ ወተሃደራዊ ንጥፈታት ከም ዘሻቐሎ ድሕሪ ምጥቃስ፡ ኣብ ልዕሊ እታ ሃገር ተሪር ቊጠባዊን ካልእን ስጒምቲታት ክወስድ ከም ዝኽእል ካብ ዋይት ሃውስ እተረኽበ ዜናታት ሓቢሩ።

ሩስያ ብወገና፡ ን ዩክሬን ከተጥቅዕ ዝኾነ መደብ ከም ዘይብላ ብምጥቃስ ነቲ ክሲ ውዱቕ ጌራቶ’ላ።

ፑቲን፡ ነቲ ዩክሬይን እትገብሮ ዘላ መናውራን ንወገን ምብራቕ ኣብ ዶባት ክልቲኣተን ሃገራት ዘሎ ምስፍሕፋሕ ሓይልታት ኔቶ ከም ዘሻቐሎን ድሕሪ ምጥቃስ፡ ምትንዃይ እትገብር ዘላ ዩክሬይን እያ ክብል ወቒሱ’ሎ።

ኣብ መንጎ ሩስያን ኣመሪካን ዝተኻየደ ዘተ ካብ ሰዓት 10 ብኣቆጻጽራ ኣመሪካ ከም ዝጀመረን ኣብ ዕጹው ማዕጾ ከም እተኻየደን ጸብጻብ ቢቢሲ ኣመልኪቱ።