ሰራዊት ኢትዮጵያ: ብሰንበት: ኣብ ትግራይ ኣብ እትርከብ ታሪኻዊት ከተማ ኣክሱም: ንህወሓት እሃድን ኣለኹ ብዝብል ሰበብ: ኣብ ሓደ ሆስፒታል: ወራር ምክያዱ AFP ንዶክተራት እቲ ሆስፒታል ብምጥቃስ ጸብጺቡ።
እቶም ወተሃደራት: ኣብ ልዕሊ እቶም ዶክተራት ነርስታትን ከምኡውን ተሓከምቲ ብረት ብምቕናዕ ምፍርራህ ዝመልኦ ሕቶታት ምቕራቦም: ስሞም ክጥቀሱ ዘይደለዩ ሰባት: ነቲ ማዕከን ዜና ሓቢሮም ኣለዉ። እቶም ወተሃደራት: ብዘይካ’ዚ: ኣብ ኣካላት ተሓከምቲ ዝነበረ መሸፈኒ ቊስሊ (ባንዴጅ) እናቐለጡ ከምኡውን ናብ ደም ሱር ዝኣቱ ፈሳሲ ከንትዑ ከም እተራእዩን ነቶም ዶክተራት ብብረት እናወጣወጡ ብዙሕ ምፍርራህ ከም ዝገበሩሎምን ተገሊጹ። እቶም ወተሃደራት: ኮነ ኢሎም ካብ ሓደ ክፍ ሊ ናብቲ ካልእ ክፍሊ ሆስፒታል እናኸዱ: ተመሳሳሊ ኣባላት ሓካይም ናይ ምርዓድ ተግባር ምፍጻሞም ትካል ገባር ሰናይ ሓካይም MSF ገሊጹ። ወተሃደራት: ኣብ ልዕሊ ዘይሻራዊ ዕዮ እዚ ትካል ዝወርዶ ዘሎ ቀጻሊ ጎነጽ ኣመና ኣተሓሳሲቡና ይብል MSF.
ሻብዓይ ወርሑ ሒዙ ኣብ ዘሎ ኲናት ትግራይ: ኣሽሓት ሰባት ተቐቲሎምን ካልኦት ሚልዮናት ከኣ ተመዛቢሎም ኣለዉ። ኣብ መሬት ትግራይ ዝኣተዉ ሰራዊት ኤርትራን ኢትዮጵያን: ኣብ ልዕሊ ሲቪላውያን ዘስካሕክሕ ገበናት ኲናት ክፍጽሙ ምጽንሖም ዝተፈላለዩ ምንጪታት ይሕብሩ።
