ቀዳማይ ሚኒስተር ሽወደን ስቲፈን ሉፈን ነቲ ምትእትታው ቱርኪ ኣብ ሰሜን ሶርያ ዘስዓቦ ብሰልፍታት ሽወደን ዝተቓልሐ ሻቕላ ዋሕዚ ስደተኛታት ከም ዘፋዀሰ ተገሊጹ። ንሱ ትማል ብተለቪዥን ኣብ ዝተመሓላለፈ ክትዕ ስደተኛታት ኣብ ሽወደን ዕቑባ ክሓቱ እዮም ዝብል እምነት ከም ዘይብሉ ሓቢሩ’ሎ። “ኣብ ሽወደን ዘሎ ሕጊ ኢሚግሬሽንን ሕቶ ዕቚባን ምስ ካልኦት ሃገራት ኣውሮጳ ተመሳሳሊ እዩ። ስለዚ ስደተኛታት ብፍሉይ ንሽወደን ዝመርጹሉ ኣብነት ኣይክህልዎምንዩ” ክብል ገሊጹ’ሎ። ንሱ ጒዳይ ሓተትቲ ዕቚባ ንምፍታሕ ኣብ መንጐ ሃገራት ኣውሮጳ ዘሎ ምትሕግጋዝ ክድንፍዕ ተላብዩ’ሎ። በንጻርዚ መራሕ ዓቃባዊ ሰልፊ ኡልፍ ክሪስተርሰን ሽወደን ዘይተዳለወትሉ ዋሕዚ ስደተኛታት ክመጻ እዩ ዝብል ሻቕላ ከም ዘለዎ ኣብቲ ክትዕ ገሊጹ’ሎ።
