ሰልፊ ሊበራላዊ ፡ ስደተኛታት ተማሃሮ እቶም ዝበዝሐ ብኩራት ዘርእዩ እዩም።

ቤት ጽሕፈት ጉዳያት ቤት ትምህርታት ነቶም ብሰንኪ ቅልውላው ኮሮና ንደቆም ናብ ቤት ትምህርቲ ዘይሰዱ ወለዲ ዕላማ ዝገበረ ናይ ሜድያ ጎስጓሳት ክፈጥር ከምዘለዎ ሊብራላዊ ሰልፊ ጸዊዑ። ዝበዝሐ ብኩራት ኣብቶም ካብ ካልኦት ሃገራት ዝመጹ ስደተኛታት ይረአ ከምዘሎን ክፋል ናይቲ ጸገም ድማ ግቡእ ሓበሬታ ዘይምርካብ ክኸውን ከምዝኽእል ሓላፊት ሰልፊ ዝኾነት ኒያምኮ ሳቦኒ ትሕብር።

ወለዲ ተማሃሮ ብዛዕባ ኮሮና ቫይረስ ዘለዎም ስግኣታት ንምጉዳል ዝዓለመ ጎስጓሳት ክወሃቦም ከምዘለዎን ኣብ ዮቶቦሪን ማልሞን ከምዚኦም ዓይነት ጎስጓሳት ጽቡቕ ውጽኢት ከምተረኽቦም ሳቦኒ ኣብቲ TT ዘመሓላለፎ ሓቢራ። ክሳብ ሕጂ ክንደይ ዝኣኽሉ ሰባት ንመስርሕ ግዴታዊ ትምህርቲ ከምዝጠሓሱ ዝፍለጥ እኳ እንተዘየለ ብዝሒ ስደተኛታት ክውስኽ እንከሎ ብዝሒ ብኩራት ብኡ መንጽር ይበዝሕ ትብል ሳቦኒ።