ናይ መምርሒ ፍቓድ መኪና፡ ክልሰ ሓሳባውን ግብራውን ፈተና ንምክያድ ዝዳለዉ ተፈተንቲ ንውሕ ዝበለ ግዜ ከም ዝጽበዩ ይግበር ምህላዉ ሬድዮ ሽወደን ሓቢራ።
በዓልመዚ ትራፊክ ብምኽንያት ቅልውላው ኮሮና መርመራ ፍቓድ መዘወሪ መኪና B ንግዜኡ ክቋረጽ ምግባሩ ዝፍለጥ ኮይኑ፡ ከም ውጽኢቱ ድማ ምንዋሕ ቈጸራን ምጽፍጻፍ ፈተናታትን ከስዕብ ከምዝኸኣለ ተፈሊጡ ኣሎ። ኣብ ስቶክሆሎም ዝርከቡ ተፈተንቲ፡ ናይ ፈተና ቆጸራ ንኽሕዙ፡ ብገምጋም ሰለስተ ኣዋርሕ ክጽበዩ ይግደዱ ምህላዎም ተሓቢሩ።
ተቐማጢት ስቶክሆልም ዝኾነት ልዊስ ክለቨንቤሪ፡ ኣብ ወርሒ ሓምለ ዝገበረቶ መርመራ ምዝዋር መኪና ዘሕልፋ ነጥቢ ኣይረኸበትን። ይዂንምበር ክሳብ መፋርቕ ጥቅምቲ ሓድሽ ናይ መርመራ መዓልቲ ከም ዘይተቘጽረት ትገልጽ። ክለቨንቤሪ፡ እዚ ነዊሕ ናይ መጸበዪ ግዜ እዩ ትብል። እዚ ንዘየድሊ ወጻኢ ከቃልዓኒ እዩ ብምባል ድማ ኣማሪራ።
ኣብ ወቕቲ ጽድያ ዝወሃብ ዝነበረ ብዝሒ ክልሰ ሓሳባዊ መርመታት ክፋረቕ ከም እተገብረ ዝፍለጥ ኮይኑ እዚ ዝተገብረሉ ምኽንያት ኣብ መንጐ ተፈተንቲ ዝነበረ ርሕቀት ንምፍንታት እዩ ተባሂሉ። ኣብ እዋን ክረምቲ፡ ሰዓታት ስራሕ ብምንዋሕን ገለ ገለ ቦታታት ብምውሳኽን በዓልመዚ ትራፊክ ነቲ መርመራ ከስፍሖ ተራእዩ እዩ።
ናይ ትጽቢት ግዜ፡ ካብ ዞባ ናብ ዞባ ዝፈላለ ኮይኑ፡ ኣብ ደቡባውን ሰሜናውን ከባቢታት ሽወደን ዝሓሸ ስሉጥነት ምህላዉ ዝፍለጥ ኮይኑ፡ ኣብ ስቶክሆልም ግን ነዊሕ ናይ ትጽቢት እዋን ከምዘሎ ተገሊጹ። ካብቶም ሓደስቲ ንመርመራ ዘመልክቱ ሰባት ንላዕሊ እቶም ዝተመርመሩ ዝያዳ ከምዝሳቐዩ ጸብጻባት ይሕብሩ።
ኣብ ስቶክሆልም ዘሎ ኩነታት ብጣዕሚ ዝበኣሰ እዩ። ዳግማይ ፈተና ንኽትገብር ሕጂ እንተድኣ ኣመልኪትካ፡ ንጥሪ ወይ ድማ ንለካቲት ቆጸራ ክትረክብ ትኽእል ክብል ሓላፊ ክፍሊ መርመራ ፍቓድ ምዝዋር መኪና፡ ሪካርድ ግራንሉንድ ይገልጽ።
ናይ ትዕዝብቲ ግዜ ምንዋሕ ኣብዚ ወቕቲ ክንቅጽሎ ተስፋ ንገብር። ተወሰኽቲ ሰራሕተኛታት ኣብ ዝረኽብናሉ እዋን ድማ ነቲ ጥርሑ ዘሎ ናይ ፈተና እዋናት ኣመልኪትና ሓበሬታ ብምውጻእ፡ ኣብ ዝሓጸረ ግዜ ነዚ ሽግር ክንፈትሖ ክንፍትን ኢና ክብል ወሲኹ ኣረዲኡ።
ሕጂ ኣብ ወጥሪ ኢና ዘሎና፡ ይኹን እምበር፡ ኣብ መንጐ ወጥሪ ኮሮናን ፈተናታት መምርሒ ፍቓድ መኪናን ዘሎ ሚዛን ክንሕሉ ክንፍትን ኢና። ስራሕና ብምስፋሕ ዝያዳ መርመራታት ክንገብረሉ እንኽእል ኣጋጣሚታት ምፍጣር ናይ ወትሩ ዕላማና እዩ ክብል ዘረብኡ ዛዚሙ።
