መንግስቲ ሽወደን ነቲ ጀሚርዎ ዘሎ ዝቐልጠፋ ባቡራት ናይ ምስራሕ መደቡ ወላ’ኳ ካብ ዓቃባውን ክርስትያን ዲሞክራስያዊ ሰልፍታት ደገፍ እንተዘይረኸበሉ ክቕጽሎ ምዃኑ ሚኒስተር ሚኒስትሪ መጓዓዝያ ሽወደን፡ ቶማስ ኢኒሮስ፡ ሓቢሩ። ዝቐልጠፋ ባቡራት ናይ ምስራሕ እማመ ወላ’ኳ እኹል ደገፍ ኣይርከብ ናብ ፓርላማ ክቐርብ ምዃኑን ሰልፊ ሞደራትና ድማ ነቲ እማመ ክድግፎ ተስፋ ከም ዘለዎ ሚኒስተር መጓዓዝያ ሽወደን፡ ኢኒሮስ፡ ንሬድዮ Ekot ኣብ ዝሃቦ መብርሂ ገሊጹ። መጠን ዋጋ ናይዚ ወፍሪ ክሳብ 230 ቢልዮን ክሮነር ተገሚቱ ኣሎ። ሽሕ’ኳ እቲ መደብ ሓደ ኣካል ናይቲ ኣብ ጥሪ ዝተገብረ ስምምዕ እንተኾነ፡ መስመራት መንገዲ ባቡር ናይ ምግፋሕ መደብ ግን ኣብ ውሽጢ ግዜ ናይዚ ዘሎ መንግስቲ ክኸውን ከምዘለዎ ተሓቢሩ።
