መንግስቲ፡ ረድኤት ዝጸዓና መኻይን ናብ መቐለ ከምዝተበገሳ ገሊጹ

ሚኒስትር ጉዳያት ወጻኢ ኢትዮጵያ፡ ረድኤትን ነዳድን ዝጸዓና መካይና ካብ ርእሰ ከተማ ዓፋር ሰመራ፤ ናብ መቐለ ጉዕዞ ከምዝጀመራ ኣፍሊጡ።

እቲ ቤት ጽሕፈት ከምዝበሎ፤ ትማሊ ሓሙስ 20 ረድኤት ዝጸዓና ከምኡ’ውን ክልተ ነዳዲ ዝጸዓና ተሽከርከርቲ ናብ መቐለ ጉዕዞ ጀሚረን ኣለዋ።

እቲ መግለጺ ፡ ኣብ’ቲ ክልል ዘሎ ድሌት ሰብኣዊ ረድኤት ንምምላእ፤ መዓልታዊ 20 ረድኤት ዝጸዓና መኻይን፡ ናብቲ ክልል ክኣትዋ ምዃነን የረድእ።

ዋና ዳይሬክተር ውድብ ጥዕና ዓለም ዶክተር ቴድሮስ ኣድሓኖም፡ ኣብዚ እዋን ካብ ዝኾነ ከባቢ ዓለም ንላዕሊ ዝኸፈአ ቅልውላው ኣብ ክልል ትግራይ ከምዘሎ ተዛሪቡ ነይሩ፡፡

ዶ/ር ቴድሮስ ኣብ መግለጺኡ፡ እቲ ዝመርሖ ትካል ውድብ ጥዕና ዓለም፡ 95 ሜትሪክ ቶን መድሓኒት ናብ ትግራይ ከእቱ ፍቓድ ከምዘይረኸበ’ውን ወሲኹ ሓቢሩ፡፡