ሓያሎ መራሕቲ ዓለም፡ ሩስያ ኣብ ልዕሊ’ቲ ኣብ ኣውሮጳ ዝዓበየ ምዃኑ ዝንገረሉ መደበር ኑክሌራዊ ጸዓት ዩክረይን ዝፈጸመቶ መጥቃዕቲ ኮኒኖም።
ኣብቲ ኣብዚ እዋን’ዚ ኣብ ትሕቲ ምቁጽጻር ሓይልታት ሩስያ ኣትዩ ዘሎ መደበር ዛፖርጅጃ ድሕሪ’ቲ መጥቃዕቲ ባርዕ ሓዊ ምርኣዩ ከቢድ ሻቕሎት ፈጢሩ ነይሩ’ዩ።
እንተኾነ ግን፡ እቲ ባርዕ ኣብ ቀንዲ ገንእታት ኑክሌር ዘይኮነ፡ ኣብ ሓደ ቤተፈተነ ዝርከቦ ህንጻ ምዃኑ ነቲ ዝኸፍአ ስግኣት ኣወጊድዎ’ሎ።
ሰብስልጣን ዩክሬን እቲ መጥቃዕቲ “ናይ ብሓቂ ኑክሌራዊ ሽበራ’ዩ” ክብሉ ገሊጾሞ ኣለዉ።
ቀዳማይ ሚኒስተር ብሪጣንያ ቦሪስ ጆንሰን “ሃንዳፍ ተግባራት ፕረዚደንት ፑቲን ሕጂ ንውሕስነት ምሉእ ኣውሮጳ ኣብ ሓደጋ ኣውዲቕዎ’ሎ” ክብል ነቲ መጥቃዕቲ ኮኒኑ።
ሚኒስተር ምክልኻል ብሪጣንያ በን ዋለስ ብወገኑ፡ “ንዩክሬንን ሩስያን ጥራይ ኣይኮነን ሓደገኛ፡ ንኣውሮጳ’ውን ሓደገኛ’ዩ። ካብ ስነሞጎት ዝወጸ ብሓዊ ምጽዋት’ዩ” ክብል ገሊጽዎ’ሎ።
ቀዳማይ ሚኒስተር ካናዳ ኣብ ዝሃቦ ግብረመልሲ ድማ እቲ “ዘሰንብድ” ዝበሎ መጥቃዕቲ “ብህጹጽ ከብቅዕ ኣለዎ” ኢሉ።
ፕረዚደንት ኣመሪካ ጆ ባይደን’ውን፡ ሩስያ ኣብ ከባቢ’ቲ መደበር ኑክሌር እትገብሮ ወተሃደራዊ ንጥፈታት ደው ከተብሎ ተማሕጺኑ’ሎ።
ዋና-ጸሓፊ ወተሃደራዊ ኪዳን ሰሜን ኣትላንቲክ (ኔቶ) ጀንስ ስቶልተንበርግ፡ እቲ መጥቃዕቲ ንኣዕናውነት ናይቲ ኩናት ዘርእን “ደው ክብል ኣገዳሲ ምዃኑን ዘርኢ’ዩ” ክብል ገሊጽዎ።
መራሒ ኢጣልያ ቀዳማይ ሚኒስተር ማሪኦ ድራጊ ኣብ ዘውጽኦ መግለጺ ድማ፡ “እቲ ኣሰቃቒ መጥቃቲ፡ ኣብ ልዕሊ ኩሉ ዝወረደ መጥቃዕቲ’ዩ” ክብል ነቒፉ። “ሕብረት ኣውሮጳ ብሓድነትን ዝለዓለ ቆራጽነትን ግብረመልሲ ክህብ” ድማ ጸዊዑ።
ቀዳማይ ሚኒስተር ኖርወይ’ውን፡ ነቲ ኣብ ልዕሊ’ቲ መደበር ኑክሌር ዝተወስደ መጥቃዕቲ ከምዝኹንን ኣፍሊጡ’ሎ።
